فراق ترك في داخلي بركان

مساحات الفرح تصغر ولا يبقى سوى همي
وضياع احلام وفراقٍ ترك في داخلي بركان




تعبت استوهم الفرحه ..تعبت ابكي على حلمي
تعبت اوقف على اطلاله وادور له على عنوان




اشوفك يالحزن وافي كأن اللي رضعك امي!!
او انك جيت من غربه ولقيت فداخلي اوطان!!

 

 

على الاطلال لا تبكي كفى تبكي على الاطلال
"تناسـى الهـم ياقلبـي كفانـا غربلـه وهمـوم

تعال احسب معي الايام وكم ليله بليا وصال
خلاص الماضي ما يرجع ترى حنا عيال اليوم

هذاك اول نعيش بحب ونتهنى براحة بال
هذاك اول قبل نكبر وتصبح ف العلوم علوم

ياقلبي هذي الدنيا ودايم تنقلب الاحوال
ترى ماني الوحيد اللي بصدري ضيقه ومكتوم

انا ادري ان التعب ظالم ولا يحسب عنا الرجال
واعرف الحظ ليمن طاح يبيله وقت لين يقوم

وذي قسمتنا ياقلبي تصبر عالحزن لو طال
امر مكتوب ومقدر وكيف نغير المقسوم

مهو ذنبي ولاذنبك نعاف الحلم والامال
مدام ان السهر فارض علينا ما نذوق النوم

ياقلبي تعبت عيوني وهي تنظريمين شمال
ادور للامل لكن لقيت ان الامل معدوم

ياقلبي لا المطر جانا ولا حتى بعد همال
ما غير تحوفنا الغيمه تمنينا المطر وتحوم

انا احب البحر واعرف هدير الموج واليامال
ولكني معا هذا احس اني مااطيق العوم

اعيش بفقري وراضي ولا ودي يجيني مال
لاني لولقيت المال وجيت اشري عجزت آسوم

ياقلبي مر في سمعي كثير مُن الحكم وامثال
ولكن ما لقيت اصدق من اللي قال بكره يوم

تعال نعيش دنيانا ونتعود على ذا الحال
ويمكن شمسنا تشرق وتصبح ف العلوم علوم